Новинки Людки Сильновой

Проза ў майскім нумары прадстаўлена апавяданнямі Маргарыты Латышкевіч, Кацярыны Назаравай, Вікторыі Сінюк, Сяргея Белаяра, Жанны Міус, Наталлі Ніканчук. Усе аўтары – маладыя па ўзросце празаікі, якія сур’ёзна займаюцца літаратурнай творчасцю, лаўрэаты айчынных літаратурных конкурсаў.

Сярод паэтаў нумара – Міхал Бараноўскі, Андрэй Кімбар, Васіль Зуёнак, Людка Сільнова. З літаратурным дэбютам віншуем паэтку Вольгу Друшчыц!

Таксама ў нумары матэрыялы круглага стала «Мастацтва і штучны інтэлект». У размове прынялі ўдзел прадстаўнікі Міністэрства культуры Беларусі і Саюза пісьменнікаў, мастакі, пісьменнікі і рэдактары, спецыяліст па кібербяспецы. Абмяркоўвалі найноўшыя тэхналогіі ды іх уплыў на наша жыццё. Ці можа штучны інтэлект цалкам замяніць чалавека? Наколькі мастакі пацярпелі ад інтэрнэт-мастацтва? NFT прадае рэч альбо права на валоданне рэччу? Ці не сорамна зарабляць на NFT?

У рубрыцы “Пераклады” – апавяданні Фрэнсіса Скота Фіцджэральда.

Вершы з новай кнігі Людкі Сільновай прысвечаны ўзаемаадносінам чалавека і цывілізацыі, з аднаго боку, і чалавека і прыроды, з іншага. Свет трансфармуецца. Ці застаецца ў ім досыць вольнага месца для шчырасці, кахання, сяброўства, чалавечай годнасці і пачуцця бяспекі? Разам з героямі, якія паўстаюць часам нават з сівой даўніны і легенд, аўтарка даследуе ролю асобнага чалавека ў жыцці сучаснага вялікага горада і інфармацыйнага грамадства. На дапамогу ёй прыходзяць здабыткі сучаснай навукі, музыка і ўласная "тэхніка дэтэктыўнага пісьма".
Кніга прызначана сучаснаму, найперш гарадскому, чытачу з добрай адукацыяй і жаданнем прыстасавацца да хуткаплыннага жыцця ў мега-гарадах будучыні.

Самая вядомая з шэрагу кніг візуальнай паэзіі Людкі Сільновай. «Рысасловы» - такое жанравае найменне прыдумаў для гэтых твораў Алесь Разанаў. Зборнічак прачытваецца за хвіліну, але да яго прыемна вяртацца цягам жыцця.